संपादकीय
बारामती लोकसभा मतदार संघात विजय प्राप्त करण्यासाठी भाजपने कंबर कसली असून बारामती मिशन चा नारा देण्यात आला आहे. या अनुशंगाने रविवारी (दि.26) पक्षाचे प्रदेशाध्यक्ष चंद्रशेखर बावनकुळे यांच्या हस्ते बारामती लोकसभा मतदार संघात बारामतीसह इंदापूर तालुक्यात बावन्न शाखांचे उद्घाटन करण्यात येणार असल्याची माहिती भारतीय जनता युवा मोर्चाचे प्रदेश सचिव दीपक काटे व भाजपाचे इंदापूर तालुकाध्यक्ष शरद जामदार यांनी पत्रकार परिषदेत माहिती दिली.
या बावन्न शाखांमध्ये युवा मोर्चा व युवा वॉरियर्स च्या शाखांचा समावेश आहे. या उद्घाटन कार्यक्रमास माजी मंत्री हर्षवर्धन पाटील यांचेसह विधान परिषदेचे आ. गोपीचंद पडळकर, आ. राम शिंदे, बाळा भेगडे, विक्रांत पाटील, मुरलीधर मोहोळकर, राहुल लोणीकर, योगेश टिळेकर, नरेंद्र पाटील जिल्हाध्यक्ष गणेश भेगडे या प्रमुख मान्यवर नेत्यांसह, स्थानिक पदाधिकारी यांची उपस्थिती असणार आहे.
शाखा उद्घाटनाच्या पहिल्या टप्प्यात इंदापूर तालुक्यातील युवा मोर्चा व युवा वॉरियर्स च्या शाखांचे ओपनिंग करण्यात येणार आहे तर दुसऱ्या टप्प्यात बारामती व कर्जत जामखेड येथील शाखांचे उद्घाटन करण्यात येणार आहे.
तसेच सायंकाळी पाच वाजता इंदापूर नगरपरिषद मैदानावर जाहिर सभेचे आयोजन करण्यात आली असल्याची माहिती भाजप तालुकाध्यक्ष ऍड. शरद जामदार यांनी दिली.