लोणी औद्योगिक वसाहतीतील आॅक्सिजन सिलेंडरच्या बेकायदेशीर साठ्यावर जिल्हा अधिकारी डॉ राजेश देशमुख व जिल्हा पोलीस अधीक्षक याच्या मार्गदर्शनाने इंदापूर पोलिसांनी केलि कारवाई, ७२ सिलेंडर जप्त
एकीकडे कोरोनामुळे राज्यात प्रचंड ऑक्सिजन चा तुटवडा भासत असल्याने रेल्वे, विमानाने ऑक्सिजन मागविला जात आहे. असे असताना दुसरीकडे मात्र इंदापूर तालुक्यातील लोणी औद्योगिक वसाहतीतील कंपनी वाय एक्सिस स्ट्रॅक्चरल स्टील लिमिटेडमध्ये बेकायदेशीर रित्या साठवणूक करण्यात आलेल्या आॅक्सिजन सिलेंडरच्या साठ्यावर कारवाई करुन ७२ सिलेंडर जप्त करण्यात आले.
याबाबत सविस्तर हकिकत अशी की, पुणे ग्रामीणचे पोलीस अधिक्षक डॉ. अभिनव देशमुख यांना इंदापूर तालुक्यातील लोणी औद्योगिक वसाहतीमधील वाय एक्सिस स्ट्रॅक्चरल स्टील लिमिटेड या कंपनीत साठा करुन ठेवल्याची माहिती मिळाली. या माहितीच्या आधारे पोलीस अधिक्षकांनी तात्काळ दखल घेत इंदापूर पोलीस ठाण्याचे पोलीस निरीक्षक धन्यकुमार गोडसे यांना कारवाई करण्याचे आदेश दिले.
पोलीस अधीक्षक डॉ.अभिनव देशमुख यांचे मार्गदर्शनाखाली पोलीस निरीक्षक धन्यकुमार गोडसे, बिट अंमलदार दिपक पालके, मोहंमद अली मड्डी, अमोल गारुडी, विनोद मोरे, विक्रम जमादार यांनी रात्री ९ वाजण्याच्या सुमारास वसाहतीत टाकलेल्या छाप्यात ५१ भरलेले व रिकामे २१ असे एकूण ७२ ऑक्सिजन सिलेंडर जप्त केले.
कंपनीतील स्टाॅकवरुन माहे एप्रिल २०२१ महिन्यात एकूण १७९ सिलेंडर ची आवक झाली असून त्यामध्ये एकूण १२५३ क्युबेक मिटर इतका ऑक्सिजन आणला गेला आहे. तो कोठून आणला याबाबत अधिक विचारपूस सुरु आहे.
सदर मिळून आलेल्या साठ्याबाबत प्रांताधिकारी व तहसिलदार यांना कळवले असून इंदापूर पोलीस पुढील कारवाई करीत आहेत.